Banda Gaites La Tayuela de Mecer

La Banda Gaites La Tayuela de Mecer ñaz nel sen de l'Asociación Cultural y Escuela de Gaites del mesmu nome, fundada en Madrid en xunetu de 1999, col finxu cimeru de dar a conocer la música tradicional asturiana y cántabra.

L'estilu d'esta agrupación musical casa col nomáu "marcial" pol usu de gaites de dos y tres roncones afinaes en Si bemol, la percusión de tensión alta, la vestimenta idéntica basada en traxes tradicionales enforma detallaos y la disciplinada actitú de los desfiles y les presentaciones nel escenariu.

Nel repertoriu de la Banda Gaites topamos pieces tradicionales asturianes y cántabres arreglaes pa tres voces y percusión, amás de temes d'otres rexones de caráuter celta como Escocia, Irlanda y Galicia.

La estaya de gaites cunta con dieciséis gaiteros, dixebraos ente primeres, segundes y terceres voces mientres que la batería o percusión fórmenla tres caxes de tensión, una timbalera y un bombu.

El so Direutor, Juan Oliver (Madrid, 1976) ye maestru de música y maestru gaiteru, tien esperiencia abonda n'actuaciones como solista y foi finalista nel Concursu y Amuesa de Folclore Ciudá d'Uviéu 1999 pa pareyes de gaita y tambor, Teatru de Belles Artes de México D.F. 2000, Memorial Remis Ovalle 2000 y 2001 n'Uviéu, Concursu The McAllan pa solista de gaita 2000 en Lorient (Bretaña francesa), primer premiu nel Memorial Manolo Quirós 2001 en Madrid.

No tocante a la Banda Gaites, actuó n'escenarios y cais d'Asturies, Cantabria, Madrid, Toledo, Xaén, Córdoba, a nivel nacional y n'Irlanda, Suiza, Sicilia, Grecia y Alemaña nel marcu internacional.

Tamién algamó gallardones nos certámenes a los que se presentara, recibiendo títulos como ‘Meyor Banda Gaites de fuera d'Asturies’ (2002), ‘Premiu a la Banda de Meyor Estética’ (2002), y con bonos resultaos nes calificaciones xenerales como la cuarta posición na Lliga Nacional de Bandes de Gaites.
tdm 2010 ©